No Colexio Filipenses Sagrada Familia de Vilagarcía de Arousa apostamos pola vangarda educativa e pola actualización das nosas metodoloxías para ofrecer ao alumnado as mellores oportunidades de aprendizaxe. Por iso, seguimos incorporando propostas innovadoras que favorecen o seu desenvolvemento desde as primeiras etapas.
Neste marco, apostamos por un novo programa de conciencia fonolóxica e lectoescritura, baseado nun método propio desenvolvido por Irene Berride Cuevas, docente de Pedagoxía Terapéutica do noso centro, co obxectivo de proporcionar ao alumnado unhas bases sólidas para iniciarse na lectura e na escritura.
Aprender desde Educación Infantil
O método trabállase dende Educación Infantil, acompañando o alumnado no desenvolvemento progresivo das habilidades necesarias para a aprendizaxe da lectoescritura a través de actividades e propostas adaptadas a cada etapa.
Este martes, Irene tivo a oportunidade de presentar o seu método ás familias, amosando como o levamos á práctica nas aulas e compartindo diferentes actividades e materiais que enriquecen o proceso de aprendizaxe dos máis pequenos.
Novas oportunidades de aprendizaxe
Durante o encontro, as familias puideron coñecer máis de preto esta proposta educativa e descubrir novos materiais que nos abren interesantes posibilidades de intervención e nos permiten seguir avanzando na mellora dos procesos de ensino e aprendizaxe.
No Colexio Filipenses seguimos apostando pola innovación, o traballo compartido e a actualización das nosas metodoloxías para acompañar cada neno e nena no seu desenvolvemento.
